Te aworaki nos konosé solamente dos
tipo di fe: natural I sobrenatural.
Esun natural ta outo-konfiansa ku ta
nase ku ser humano. E ta desaroyá mientras un hende amplia su konosementu. Ora
nos lanta mainta, inkonsientemente nos ta usa fe natural, pues nos ta kere ku
nos pianan lo soportá e peso di nos kurpa. Ora nos sali kas, nos tin fe ku nos
ta yega nos destino. Ora nos traha, nos tin fe ku nos ta risibí nos
salario. E pashènt mester di fe natural
pa risibí tratamentu di dòkter.. E dòkter mester tin fe natural pa duna su
pashènt un remedi. Meskos e abogado, e dentista, etc. Tur hende tin fe natural.
Fe natural ta hiba e hende na kere ku
konosementu di siensia ta produsí desaroyo, fe sobrenatural ta pone e persona
kere ku tur loke Dios a primintí den Su Palabra lo kumpli independientemente di
e sirkunstansia.
“Awor fe ta e siguransa di kosnan ku hende ta spera, e konvikshon di
kosnan ku hende no ta mira” (Hebreonan 11.1).
Un ehèmpel ta ora Se`Nor Hesus a bisa
pa e higuera seka. El a papia ku algu ku no tabatin orea!
Hopi hende ta kere den Hesus, pero
nan no ke kompromiso kunE. Kon bo por risibí promesa di un ser ku bo no tin
kompromiso kunE? Apostel Pablo ta bisa:
“Ma un hende ku no ta spiritual no ta
aseptá e kosnan di e Spiritu di Dios; pasobra nan ta lokura p'é, i e no por
komprendé nan, pasobra ta spiritualmente nan ta wòrdu huzgá.” 1 Koríntionan 2.14
Tradusiendo loke apostel Pablo ta
bisa, e kosnan natural ta diserní di forma natural, e kosnan spiritual, di forma spiritual.
E sakrifisio ku nos hasi pa nos
bienestar spiritual ta spiritual, e persona ta pèrdè su bida pa kousa di Señor
Hesus. E ta renunsiá su bida, su libertat di hasi loke e ke, pa e realisá
boluntat di Dios pa henter e periodo di su eksistensia riba Tera. Ta loke Señor
ta afirmá:
“Es ku pèrdè su bida pa kousa di Mi i e Evangelio, lo
hañ’é”